دخپریدو نیټه : 2013-03-28 مخپرونکئ : 049 - دبېنواخبریال - کندهار
د ښاروال د نه شتون له امله د کلات ښاروالۍ کارونه په ټپه ولاړ دي .
د زابل مرکز کلات چې خلک يې يو عالم ستونزي لري د څلورو مياشتو راهيسي ښاروال نه لري او د ښاروالۍ کارونه يې په ټپه ولاړي دي .
د کلات اوسيدونکي وايې چې ښار کثافاتو پر سر اخستى دى او د ښاروالۍ هيڅ فعاليت نه تر سترګو کيږي .
په ښاروالۍ کې دننه د ښاروال د ناستي دفتر قلف دى .
د کلات اوسيدونکي او قومي مشران وايې چې د ښاروال د نه موجوديت سره سم د ښاروالې کارونه هم په ټپه ولاړ دي او د تيرو څلورو مياشتو راهيسي خلک د ښاروالۍ د خدماتو څخه بې برخي دي .
په ښار کې کثافات زيات شوي ، د ښار نظافت خراب شوى او ولايتي اداره هيڅ توجه نه ورته کوي .
د زابل د سولې د عالي شورا پخوانى مشر محمدداوود ګلزار وايې : (( ښار بېله ښارواله هيڅ معنى نه لري ، په کور کې چې سرپرست نه وي کارونه ټول ګډو وډ وي ، ښاروال مکلف دى چې د خپل ښار چاري پر وخت سمبال ، صفايي ټوله کړي او خپل عايد د هغو لارو په لاس راوړي چې لايحي حق ورکړى دى څو له دې لاري بيرته ښار ته خدمات وړاندي کړي ، خو دلته په کلات کې داسي څه نشته او ښاروال هم نشته چې خلکو ته خدمات په ټپه ولاړ دي . ))
د کلات ښار اوسيدونکى دادمحمد هم ورته څرګندوني کوي او وايي : (( چرۍ ټولي د کثافاتو ډکي دي ، چټلي ده ، څوک نشته چې دا صفايي وکړي خلک خپله کثافات وړي او په ليرو ځايونو کې يې غورځوي موږ غواړو چې ژر ښاروال مقرر شي او ښاروالي فعاله شي . ))
خو د ولايتي شورا غړى حاجي محمد هاشم ګرانى بيا د ښاروال د نه شتون ستونزه په ولسي او مشرانو جرګو کې د زابل د خلکو د استازو له لوري بولي ، نوموړى وايې هر ښاروال چې راسي وکيلان بېلابېلي غوښتني ترې لري چې ونه منل شي نو بيا هغه ښاروال بدنام شي او له دندي ليري شي ، زه وايم چې ښاروال بايد خپل کار ته پرېښودل شي .
د زابل د مرکز کلات اوسيدونکي وايې مرکزي اداره دي ډير ژر په کار پوه او خدمتګار کس د ښاروال په توګه مقرر کړي څو د کلات د ښار چاري په ښه ډول سمبال شي .
د زابل والي محمداشرف ناصري د ښاروال په نه موجوديت کې بيا هم د ښاروالۍ کارونه روان او ګړندي بولي .
والي محمداشرف ناصري وايې چې د ښاروالۍ ټول مامورين په خپله دنده بوخت دي او د ښار په کارونو کې کوم نيمګړتيا نشته .
والي وويل چې اوس يې يو ښاروال ټاکلى او په نژدې راتلونکي کې به په خپله دنده پيل وکړي .
تر دې مخکې سيداحمد صافى د کلات ښاروال وو چې د ولسي جرګې د غړي عبدالقادر کلاتوال سره تر لفظي شخړي وروسته له دندي ګوښه شو .
