راپېښ غم

سربایلل په عشق کې دصنم آسانه کار نه دی
ټینګ اوسه زړګیه پښتو هم آسانه کار نه دی
مینه دوطن تر ټولو مینو دویاړډکه ده
خیرکه په دلار کې درد اوغم آسانه کار نه دی
بد کول آسان دی،خوپالل یې حوصله غواړی
ږدی چه په زخمی زړونو ملهم آسانه کار نه دی
لږبه درقیبه له تاریخه هم پوښتلی وو
خاوره دزمرو کې یو قدم آسانه کار نه دی
موږلکه یتیم ماشوم ژړاکې پاخه شوی یو
هر چاته ژړا اوسترګو نم آسانه کار نه دی
پوه یم نادانان یې ساده کړی،او ساده اخلی یې
لوړه په دلار کې او قسم آسانه کار نه دی
پرېږده چه پېشې مې دخولې کړی رقیب دخوښ وی پرې
سرپه سر سلګئ او دم په دم آسانه کار نه دی
موږچه لوی ښاماردزمانې په زړه چیچلی یو
پوه شه پاړوګره چه یې دم آسانه کار نه دی
ټول چه یو له بله لراوبر سره یو لاس نه شو
بل رنګه علاج دراپېښ غم آسانه کار نه دی
کړی درقیبان په ما روهین چه هر تهمت کوی
ویاړ خدمت اوقدر دخپل قوم آسانه کار نه دی
جرمنی- اوفن باخ