نمايشي محكمه

موږبه په محبس كې دسره صليب داستازواودنوونيول سوی وروڼوله خولوډېرډير اوريدل چې دبشري حقوقو ادارو، او ځيني دولتونو به اعتراضونه كول، چې دغه بنديان چې په ګوانتاناموكي بي برخليکه پراته دي بايد برخليک يې معلوم شي، او بنديانو به هم دخپل برخليک لپاره مبارزه كوله او محققين به يې هميشه تنګول چې زموږ برخليک معلوم كړئ، په اصطلاح مجرم، او غير مجرم بايد سره جلاشي، دتوقيف مرحله بايدنوره ختمه شي او هر څه دقانون په چوكاټ كې بايد داخل شي،خو ددريو كلونو وروسته محقققينو يوه بي قانونه نمايشي ټولى انتخاب كړه ترڅو بنديان مصروف او دنيا دوكه كړي، دغه ګروپ چې له محققينوڅخه جوړ شوي و، دبنديانو دموقف معلومولو اداره اين انمي كمبيټيند ستي ټس ټرايبيونل ريويو بورد
(An enemy combatant status tribunal review board)
ددغه ټولګي لخوامونږ ته كاغذي ليكلي پرچي توزيع شوي او په ابلاغيې سره يي تاكيد كيده، پكښي ويل شوي و تاسو دامريكا جنګي دښمنان ياست امريکاحق لری تاسی وساتي خو دغه اداره بيا تجديد نظر كوي چې څوك واقعي دښمنان دي او څوك نه دي،
كه څوك جنګي دښمنان ثابت شي نو بيا ورته موقع وركول كيږي چې په امريكاكې يوي ملكي محكمي ته چې دكلومبيا د ډستريكټ كورټ په نامه (Colombia District Court) ياديږي پيشنهاد وكړي او خپل دوسيه چلينج كړي اوکه بری شی نوازادبه شی ،لومړى ځل ځيني وروڼو ورته خوشبيني ښودله خو په حقيقت كې يوه غير قانوني او توهينوونكي غوندي دوكه او سازش و، يو محقق به ځان معرفي كاوه چي ستا دوسيه به مخ ته بيايې کمک اوهمکاری به درسره کوی او ستا شخصي (Personal Representative) نمايندګي به كوي, بل محقق به دحكومت استازيتوب كوي، څوك به ناظرين وي، څوك به قاضيان وي، په حقيقت كې ټول دامريكايې استخباراتو څارنوالان و ، ديادوني وړده چې دغه ټول عسكري محققين يواځي ددي لپاره روزل شوي وو، چې له بنديانو څخه تحقيق وكړي نه دقانون او فيصلي لپاره، دغه ټولي دقانون له نظره هيڅ قانوني حيثيت نه درلود، او يو سړي هم په قضايي قانون نه پوهيده، ځكه نه يې مسلك او دنده وه، او نه يې قضايي زده كړې كړې وي .يواځې يوه لوبه وه چي روانه كړي يي وه اوده مسلمانانو په سرنوشت يي ملنډی وهلی . زه هم دغه استازي چې ځان يې زما سره همكار معرفي كاوه بوتلم او دتحقيق په خونه كې يې تر محققينو سخت چلند راسره وكړ ، او بيايې راته وويل چې زه ستا شخصي استازي يم، او له تا سره كومك كوم ستاددفاع لپاره به ستاشواهد راټولوم، اوس ته ماته ټول جريان ووايه چې ته څنګه نيول شوي يې اوڅه جرم دی کړی دی بيا به زه ستا دفاع وكړم، زما سره چې مخكي هم شك و، او تر اوسه هم په شك كې وم، په نرمه اوپسته لهجه مې ورته وويل، مخكي له دې چې زه تا ته خپل جريان ووايم زه څو سوالونه لرم كه ته راته توضيح راكړې، ده وويل سمه ده سوال دی وکړه ؟ماورته وويل لومړى دا چې ته زما دفاع كوي په قانون پوهيږي کنه؟ قضايي زده كړه يا مطالعه دي كړي ده كنه؟ ده وويل نه. دويم ته چې كومي ټولي ته ما بيايې چې پر ما باندي حكم كوي، هغه خلك قضاء پوهان دي؟ ده وويل نه. دريم- ته او هغه ټولى چې پر ما حكم كوئ يا مي ته دفاع كوي په كوم قانون سره، دامريكا په ملي قانون، او يا په بين المللي قانون سره؟ ده وويل چې قانون ستاسولپاره نشته ځكه تاسو دقانون په چوكاټ كې نه ياست، قانون په تاسو نه تطبيقيږي، يوازې دغه ټولى به پر تاسي فيصله كوي، څه چې يې غوښتل دوی به دځانه درباندی حکم کوی نه دقانون دلاری. څلورم موږ ته چې دغه ليكلي پيغام توزيع شو يادونه كوي چې موږ دري كاله له مخه جنګي دښمنان ثابت شوي يو، دا په كوم قانون سره اوچاراباندی حکم کړيدی؟ ده وويل زه خبر نه يم.
بيا ما ورته وويل ښه چې ته په قضاء نه پوهيږي، قاضي په قضاء نه پوهيږي، قانون وجود نلري، او دري كاله مخكي زمونږ په غياب فيصله شوي وي، نو اوس څه ضرورت دي چې زما سره صلاح، مصلحت وكړي، او زما موافقه واخلي، او ته چې زما دښمن يې زما استازي شي، زه كله هم موافقه نكوم، او نه داسي جلسي ته ورځم او نه تا استازي كوم، څه چې كوي خپل كار مودي بل ځلي ما مه وينه، خو دغه ظالم په دې زه مجبورولم، چې ته به خامخا ما استازي كوي او كه مي نه استازي كوي، نو زه ستا په غياب كي ستا استازي يم ، ما ورته په حوصله وويل، زه نه پر تا باور لرم نه ستاسو په محكمه باندي ځه چې څه كوي هغه كوه، زه نه چا ته اختيار وركوم،او نه څه درته وايم، او نه دي استازي كوم، خو اخر خبره دي ته ورسيده چې بدالفاٰٰظ مي ورته وويل اوپه ډيرتكليف سره يي زه پريښودلم، خو ددوى فيصله هم هغه وه چې څه يي كړي و ، لدي وروسته يوه بله جلسه دايره شوه چې هغه بيا دا معلومه كړي، چې ته اوس هم امريكا ته خطر يې كه نه سره له دې چې ته دامريكا جنګي دښمن يې،اودغه دويم كميسيون دايډمينستريشن ريويو بورډ په نامه ياديده A-R-B ما دغه اداري ته هم منفي ځواب وركړ،او نه يم ورغلى، خو ددغه كميسيون فيصله ماته نه ده ابلاغ شوي او په افغانانو كې تر دغه وخته چې زه راوتلم يواځې دوو نفرو ته ابلاغ شوي وه نوروروڼه لا په تعليق کی وه.
څه تورونه او تهمتونه و ، چې بندي دامريكايانو جنګي دښمن كړي،اوامريکاته حق ورکړی چی بی حده بی سرحده يي وساتی القاعده، طالب، دا هغه د سر ټكي و ، دې ته ضرورت نه و، چې نور تفصيل ولري، خو ډېر بنديان چې دالقاعدي، او اسلامي امارت سره يې اړه نه درلودله نور مختلف تورونه و ، مجاهد، او يا يې و طالب ته ځاى وركړي، او يايې ډوډۍ وركړي وي، او يا يو مشهور مجاهد يا طالب په نامه پيژني، يايې ليدلى وي، يا د چاودني، جنګ په نامه تورن وي، ان ځيني وروڼه و ، چې دغه يو تهمت هم ورباندي ثابت نه وو، په جزوي شيانو تورن و چې عقل يې نه مني، مثلاً يو سړي دمجاهدينو كوټ اغوستى و، له بل نفر سره تيلفون په جيب كې و، او يوه بل په دوربين كې خپلي مېږې څارلې، او له چا سره دهجرت كارتونه وه، چې 25 كاله مخكي يې اخستي و ، همدي ته ورته تهمتونه وه چې اكثره افغانان همدارنګه بنديان، اوبيا جنګي دښمنان ثابت شوي و .
ما ته ځيني وروڼو چې نږدي و تفيصلي خبري كولې او مابه ددوي په حالت ډېر افسوس كاوه .
افغاني بنديان څوك و ، طالب،مجاهد، دموجوده حكومت غړي ، موچي پينه دوز، پښ، چوپان، ژورنالست، صراف، دوكاندار، دمسجد امام، پخواني مجاهد، حتي ددوي خپل ژباړن، او داسي نور، خو په عربو وروڼو كې هم ديته ورته خلك وه، چې پاكستان يا پاكستان غوندي نورو دولتوپلورلي و ، مجاهدين، دموسسو كاركوونكي ژورنالستان، طالب علمان، سياسي مبصرين، حتي دذهن په ناديده مفكوره سره، چې مثال يې دبوسنيا شيخ صابر وو. دپښتنو دمنطقو ډېر وروڼه په عربو كې مزدوري كوي او په كال كې يو ځلي اويادوه ځلي كورونو ته راځي دغه وروڼه هم نيول شوي او بنديان و ، ويزي به يې ختمي شوي وي فرياد به يې كاوه . او هغه بنديان چي ددوي په نظر بري شول هيڅ ورنه كول شول ، دري كاله بند چې دوي پخپله وايې چې بيګناه نيول شوي و بی ګنا ساتل شوی و، ان هغه دمجاهد كوټ يې هم باندي ثابت نكړي چی يوه بهانه شی، بيا هم ناهيلي پريښودل شول، دري كاله يي بي موجبه بنديان كړل اوله خپل وطن اوبچيانوڅخه يي لري ساتلي و . چې بنديانو دامريكايانو دا ناروا عمل وليده او په دي پوه شول چې يواځې دوكه راكوي او ورځ تيروي بيايې په اعتصاب لاس پوري كړ، ځيني بنديانو ډوډۍ نه خوړله او ځينو به ډوډۍ اوبه دواړي نه كولې، او ځينو به يو وخت ډوډۍ اخيستله ،تر دي چې ځينو عربو وروڼو تر مرګه هوډ كړي وو، په همدي طريقه دوه سوه پنځه اويا كسه له ډوډۍ خوړلو محروم و ،او شمېر به يې ورځ په ورځ زياتيده، څه يې غوښتل، محكمه، د بشر احترام او بس.
26 ورځي دډوډۍ نه خوړلو اعتصاب روان و، او تقريباً دبنديانو څلور په پنځو كې يې برخوال و ، يواځې مريضان سپين ږيري پاتې وه، ددي لپاره چې دخلكو مشكلات دفع شي دكمپ مسؤول جنرال بنديانو ته وعده وركړه، چې ځيني مادي دجينوا دكنوينشن مطابق به بنديانو ته حقوقوق وركوي، خو فعلاً دي بنديان ډوډۍ وخوري او هړتال دي ودروي، شيخ شاكر چې دسعودي دتابعيت درلودونكي و، او په برتانيه كې كډوال ستوګن و، په انكريزي ژبه ښه پوهيدي، او په بنديانو كې يې هم محبوبيت درلود په بنديانو ګرځاوه، تر څو بنديان ډوډۍ وخوري، او اعتصاب ودروي او دا وعده به يې وركوله، چې بنديان دي خپل استازي وټاكي، هغه به دبنديانو په ستونزو غور كوي او امريكايان به ددغه نمايندګانو سره تفاهم كوي، او دجينوا دكنوينشن ځيني مادې به په دكمپ په داخل كې تطبيقيږي ترڅوپه تفاهم سره مشکل حل سی.
بنديانو اعتصاب ودراوه او ډوډۍ يې شروع كړه، دبنديانو له ما بينه شپږ استازي وټاكل شول، چې دبنديانو مطالبي ترتيب كړي او بيايې له امريكايې مسؤولينو سره مطرح كړي، شيخ شاكر، شيخ عبدالرحمن، شيخ غسان، شيخ صابر، شيخ ابوعلي، اوزه ، د مجلس لپاره انتخاب كړل شوو، موږ كوښښ كاوه چې څومره ژر بايد دبنديانو په مطالبو غور وكړو، او دامريكايانو غولوونكي دسيسو ته ځير شو تر څو بنديان په مونږ بدګومانه نشي، دوه ځله دمجلس په كښيناستلوكې ستونزه راغله او موفق نشولو چې سره كښينو، خو په دريم ځل په داخل دكمپ كې سره كښېناستو، په لومړۍ جلسه كې چې دكال 2005 د اګست په اوومه وشوه، په دغه جلسه كې دامريكايانو دمحبس مسؤول هم وو نوم يې(Bomb garner بمب ګارنر ) او يو دمحبس قوماندان او يو بل ورسره و، او شپږ كسه دبنديانو استازي و ، بمب ګارنر لنډ چالاكه سړى چاغ او له چلوډك معلوميده، او بنديانو ته خوبه يې داهم ويل چې زه ابليس شيطان يم، او واقعاً شيطان ته ورته و، لومړى ده په خبرو شروع وكړه، دخبرو متن يې داسي وو، زه امين كمپ غواړم، ستاسو مرسته غواړم، زه په دي پوهيږم چې بنديان تاسو ته غوږ نيسي زه ستاسو سره همكاري كوم، ستاسو فيصلو ته احترام كوم، او ما دامريكا ددفاع وزير رمزفيلډ سره خبره كړي ده، چې تاسي ته ځيني دجينوا دكنويشن مطابق حقوق دركړي، البته انتخاب به يې په موږ پوري اړه لري، بنديانو په خپل وار سره خبري وكړي په جرات سره يي ورته ويل، چې امريكايان دي دمظلومو بنديان شكنجه كول ځورول توهينوونكي، اعمال غير قانوني كړنه، او د بشر ضد اعمال، ودروي نور دي زموږ په عزت او په ديني شرائعو، لوبي نكوي، څلور كاله يې دنيا په دي وغولوله چې تروريستان يې ساتلي دي مونږ بې له قانوني كړو په قفسونو كې اچول شوي يو، نور بايد دا چلونه ختم شي ، خو شيطان غوندي امريكايې به هر څه په ځان منل او ويل به يې چې څه تير شوي هغه تير شويدي، خو په اينده كې به زه او زماترلاس لاندي امريكايان تاسو ته د بشر په سترګو ګوري،اوانساني احترام به موكوي کڅه ترمالوړ اوترمالاندی خلک ستاسولپاره ښه ژوندنه غواړی، خو دا هر څه د فريب او چل كار و، هر څه وعدي دروغ وي، هيڅ ونه شول دمجلس اعضا له سختو عذابو سره مخ شول له بنديانو جدا شول او چايې معلومات نه درلود چې چيرته به وي، مشكلات بيرته شروع شول خلكو ډوډۍ پريښودل، په ټوله كمپ كې تقريباً تر دريو سوو ډېر بنديان دي ته چمتو و ، چې نوره ډوډۍ ونه خوري او 20 كسه خو داسي هم و چې نور به دامريكايانو په درو غو اعتماد نه كوي، او تر هغو به ډوډۍ، نه خوري او اوبه نه څښي، تر څويې روح له بدنه جلا كېږي، ډېرځله به اعتصاب كېده خو بيا به دامريكايانو دفريب او دروغو په وعدو ماتيده، خو وروستى اعتصاب تر ټولو سخت او دامريكا يانو دبي اعتمادۍ اعتصاب و، چې زما تر خوشي كيدلو يعني دكال 2005 د سپتمبر دمياشتي تر يوولسمي پوري يې، دخلكو شمېر زياتيده، او خلك دمرګ له خطر سره مخامخ كيدل هره ورځ به خلك دكمزورۍ له كبله لويدل ، او بيا به هسپتال ته وړل كېدل، دبيهوشۍ په وخت كې به دواوركول كيده، چې كله به په هوش كې راتلل نو به يې دسيرومونو تارونه له پوزو او رګو څخه غورځول، دوا به يې ځانته نه پرېښودله، او هوډ يې كړى و چې تر مرګه پوري به دغه هړتال ته دوام وركوي، حوصله او زغم ټولو له لاسه وركړى و، نوريې دامريكايانو ناروا ظلمونه پر ځانونو نشواي زغملاي، او تر ژوند يې مرګ ته ترجيح وركړي وه، هسپتال له داسي مريضانو ډك و، او نور مريضان ټول معطل وه، ډاكتران ټول په عاجل ډول لدوي سره بوخت وو يو خبر خو دا هم ماته ورسيد چې دخلكو حالت خراب شو ډاكټرانو ته امر وشو چې په زوره دوا او خواړه بنديانو ته وركول شي، خو دډاكټرانو مسؤول جنرال له دې كاره ډډه وكړه چې قانوني مسؤوليت له غاړي واړوي، جنرال چې اوسني ظلم ته يې دوام وركړى و، ملكي ډاكټران ددي كار لپاره چې پنځه نفره و راوستل بنديانو ته يې په زور خواړه د سپږمو له خوا وركول، اوويل كېدل چې دغه ډاكټران چې دقانون خلاف خلقو ته په زور ډوډۍ وركوي په رشوت راوستل شوي دي او د پيسو په مقابل كې يې دا ناروا، او ناجايزه كار كاوه، او دالړۍ دخبرونو له مخي تر اوسه يعني 19/1/2006 پورې دوام لري څه غواړي، دبشر احترام، او انساني حقوق، قانوني محكمه، خو امريكايان دي كار ته احترام نه كوي ديادوني وړ ده چې دافغانستان اسلامي امارت په وخت كې شپږ كسه غربيان په دي جرم سره نيول شوي و ، چې دوى غير اسلامي دعوت كاوه او له خپلو دندو څخه يې ناوړه استفاده كوله، او دوخت دحكومت دقانون خلاف كار يې كاوه، ديوي مياشتي لپاره توقيف شول او محكمه يې هم روانه وه، بدچلند نه دي ور سره شوي،قانوني وكيلان وركول شوي و ، ملاقات يې ازاد وو، خواړه يې ښه برابر و ، دوه كسه امريكايان پكښي و ، ملل متحد يوه ماده دبنديز ورباندي زياته كړه، سره لدي چې اثرات يي دافغانستان په 28 مليونو وګړو مستقيماً لويدل، خو اوس چې مسلمانان په زرګونو كسان په كلونو كلونو په زندانو كې پراته دي، دعدل او انصاف، او ددنيا داصولو ناري وهي څوك يي غږ نه اوري، او نه يي د قانون منګولو ته سپاري هغه ملل متحد دي هغه دنيا ده � ولي ، ولي-

دګوانتانامو د برزخ هدف څه وو

دلته دشك او دسوال دواړه نكتې ځاېېدلى شي چې په ګوانتانامو كې زندان جوړول مسلمانان پكښې ساتل دکومې موخې لپاره و، او دامريكايانو په مغزوكې ددي كار پايلي څومره ګټوري وي، ډير كتونكي په دې عقيده دي چې امريكا هغه برزخ ته دمسلمانانو په وروستلو كې دوي موخي درلودي، اول دا چې دنړۍ ټول مسلمانان چې دامريكا دمعنوي استعمار له پاليسۍ سره مخالفت لري په كلكه ووېروي چې وښيي امريكا دچا له پروا پرته څه چې وغواړي هغه كوي، او دخلكو برخليك هم ددوي په واك كې دى، دويم دا چې كومه هيولا ددوى په نظر كې نقش شوې چې ظاهرايې دتروريست نوم وركړى په هغه جزيره كې وساتي چې ديوه ملك قانون هم نه پكښي چليږي او په دې توګه دخلكو په برخليک، عزت او مذهب لوبه وكړي.
بوش چې بي ګناه مسلمانانوته يې ډير توهينوونکي القاب كارول، تر ډيره په سوچه درو غو سره بريالی شو چې دامريكا ملت او هم دنيا وغولوي، چې ګوياده او دده عسكرو په ګوانتانامو كې دده په اصطلاح سړي خواره تروريستان ساتلي، دنيايي ددوى له شره ژغورلې او ځان يې ددي ابتكار قهرمان ګاڼه، خو دوخت تيريدلو هرڅه په عكس وښودل، دا ثابته شوه چې په ګوانتانامو كې ساتل شوي، بنديان اكثره بي ګناه، بي جرمه دي او په تدريجي توګه خوشي كړل شول، بوش چې غوښتل يې برمته شوي مسلمانان دبلا غوندي معرفي كړي په دي ونتوانيد چې دمحكمي لپاره څوك خپل ملت ته وړاندي كړې چې خپله بي اساسه دعوه ثابته كړي، چې کم ترکمه ده په دغه جزيره كې نيم يا دريمه حصه يا څلورمه حصه مجرمين او تروريستان ساتلي دي، ملت او نړۍ ته يې دروغ ښكاره شول او دنړۍ دنورو هيوادونو فشار دي ته مجبور كړ، چې دګوانتانامو دظلم او بي قانونه زندان دتړلو اعلان وكړي، كه څه هم دامريكي دبوش داداري تصميم نيوونكي په دې عمل سره پښيمانه دي او دا يوه لويه خطا بولي خو بيا هم دامريكي دظلم دپټولو په خاطر خاموشه دي. بالاخره دګوانتانامو دزندان نتيجه څه شوه، دامريكا لپاره ګټه شوه، كه دمسلمانانو لپاره تاوان شو، زما په نظر څو مهم اړخونه لري چې دامريكي په تاريخ كې به د هغه دولت لپاره دعار او شرم انځور وي.
يو دا چې بوش ثابته كړه، چې دنړيوال قانون مراعات په بي وزلو او كمزورو دي زورځواكه هيوادونه د نړيوال قانون له چوكاټ نه وتلي دي.
بل دا چې دبشر احترام او حقوق دهغه چا لپاره دي چې په زور سره يې پلي كولي شي نه دمظلوم مسلمان لپاره، دريم دا چې قانون او اصول دامريكا لپاره ددوي په ګټو كې دي نه ديو حقيقت په بنسټ سره.
اوس دغو ټكو امريكا ته څه ګټه ورسوله.
لومړى: خلكو ته اوخاصتا مسلمانانو ته دبشرله حقوقو د تېري کوونکي هيواد په توګه معرفي کېدل.
دويم: دنړيوال قانون تر پښو لاندي كوونكى هيواد په توګه معرفي کېدل
دريم: له امريکا سره دنړۍ دمسلمانانو نفرت ډېرېدل.
څلورم: دظلم په برخليك اخته كېدل.
پنځم: په اسلامي مملكتو كې دبي ساري بدبختيو پيداكول چې نژدې ده كورنيو جنګونو ته لاره هواره شي. دا هغه څه دي چې دهري ورځي په تېريدو سره دامريكا وقار ته ضربه وركوي.
بله دا چې امريكا دګوانتانامو په زندان سره هر بندي دځان دښمن كړ، كه څه هم په توقيفي بنديانو كې ډير داسي خلك و چې دامريكا پاليسۍ ته يې ښه راغلاست ويلي وو خو ددوي ناوړه او ناروا بند او دبشر ضد كړنو ددوي دښمنان وګرځول، او په زړونو كې يې دهر امريكايي لپاره ډېر نفرت پيدا شو.
دويم: دګوانتانامو په زندان سره امريكا خلكو ته دشخصيت يوه تحفه وركړه او هر بندي يې دومره مهم كړ چې دنړۍ دخلكو دپاملرنې تمركز ورباندي كيږي، زما په اند هغه بنديان چې چايې نوم هم نه و اوريدلى، دګوانتانامو په وجه اوس يو رهبر جوړيدلاي شي، كه وغواړي چې دامريكا په ضد څه وكړي يواځي د ځان په عوض يو جماعت خپلولي شي، وايي احمق دومره په بل نه كوي لكه په ځان.
دريم: څرنګه چې تروريست لقب هغه چاته وركول كيږي چې په خلكو كې ويره اچوي ترڅو خپل هدف ته ورسيږي، دګوانتانامو بي قانونه دظلم او استكبار توقيف ځاي هم په دي نيت جوړ شوي، چې امريكا په خپل بي رحم او ناروا سلوك مسلمانان وويروي، ترڅو دوى ته دسلامۍ او تسليمۍ غږ پورته کړي، كه د تروريست معنى هم ويره اچول وي، نو د امريكا دغه كار يو غټ تروريستي عمل دي، سره ددي چې دوي وايي چې موږ دتروريست په وړاندي مبارزه كوو. همدي ته ورته تروريستي عملونه ورسره ضميمه كيدلاي شي لكه خلك په پيسو رانيول دخلكو دوژلو يا نيولو په سرجائزه ايښودل.

دافغانستان استازي او دخلاصېدو زېرﺉ

په 11/5/2004 نيټه چې دمباركي روژي 16 مه ورځ وه تحقيق ته بوتلل شوم، خو هغه ځاي ته چې مخكې مي نه و ليدلې ميز، كوچونه،نو ر تجهيزات او اي سي يې هم درلودل ، او تلويزيون هم پكښي نصب شوي و، لاسونه او پښي يې د عادت خلاف را خلاص كړل، او له لږ انتظار وروسته يو افغان او دري كسه امريكايان راغلل، دوه امريكايان محققين و ، چې له ما سره يې ښه وضعه كړي وه، او دريم امريكايې نابلده و، چې ځان يې په افغانستان كې دسفارت كارکوونکى معرفي كاوه، او افغان ځان دافغانستان دحكومت له خوا استازي معرفي كړ سلوك يې ښه و، خو بيا هم په شك كښي وم، او كله مي هم زړه نه منل چې دا به دافغانستان استازي وي، خو دځينو وروڼو په نښواو سلامونو مطمئن شوم چې دابه دافغانستان استازي وي، كله چې مي خبره نوره ورسره اوږده كړه پكښي راته دترحم او شفقت اثار ښكاره شول، خو كله يې هم راسره دپخواني هيئت په څير سلوك ونكړ، او وروسته مي دوه ځلي ورسره نور وكتل يو ځلي خو د ډوډۍ دعوت و، چې په لومړى ځل مي دڅلورو كلونو پس هغه خواړه وليدل چې موږ ورته خواړه ويلي شو چې داحترام مناسبت پكښي په ځاى شوي و،له حده ډېره ډوډۍ مي وخوړه، ميوه او پيپسي هم پكښي وه، استازي وعده راسره وكړه، چې زما په خلاصيدلو كې به كو ښښ كوي، خو ددي با وجود دامنيتي دلائلو له مخي يو كال بيا هم پاتي شوم، ما هم موافقه درلودله چې دامريكايانو دژونديو له هديرو څخه ووځم اوخپل وطن ته راوګرځم خوشرايط راته نه معلوميده، وروسته نور محققين راته راتلل او په هره اونۍ كې به يې يو دوه ځله ليدلم په ځينی موضوعاتوکی به يي راسره تحقيق کاوه، او بيا چې به مي څه خوړل هغه به يې راكول او څه شي ته چې به مي ضرورت و راكول به يې، معامله انساني شوه او بد رد ويل پكښي نه و ، او دژوند ځيني شرائط برابر شول خو د نورو وروڼو بيا هم هغه حالت و، چې كله به ما دمحقق څخه څه شي تر لاسه كاوه نو نورو وروڼو ته مي وركاوه، خو هر څه نه و يواځې عطر وشامپو چې تر نورو يې كيفيت ښه او دزيتون غوړي هم و
تر مياشتي دوو پوري خبره ګرمه روانه وه، خو بيا سره غلي غوندي شوه او استازي هم ماته ويلي وه چې ديوي مياشتي په اوږدو كې به راځي خو خبره له دوو درو واوښته ماته بيرته شكونه غالب شول ، اميد مي قطع شو خو دمحققينو وضعيت تغير ونه كړ سلوك او معامله يې ښه وه اوډېرډېر به يې راته ويل چې ډېر ژر به ولاړشي يواځې، داستازي خبره ده چې راشي، دكال 1/11/2005 په لومړۍ ورځ محقق راته زيري راكړ، چې په بله اونۍ كې نمائنده راځي او تا به ورسره بيايې، خو مخكي له دې به تا بل ځاي ته انتقالوي چې وار خطا نشي خو بيا هم مطمين نه وم ځكه دامريكايانو دروغ دومره ډېر و چې پكښي رښتيا په ډېر زحمت موندل كيدل، خو دمحبس نورو وروڼو به زما پر سادګي هميشه خندل او راته ويل به يې چې دتعجب خبره داده چې څنګه ته دامريكايانو خبري ته اعتبار وركوي، او ځينو وروڼو خو به قسم هم كاوه چې دا يوه دسيسه ده، او يواځې دروغ دي ستا وتل له دي ځايه تر څو نور خلك دلته وي شوني نه دي، خو ځيني نور خلك چې په موجوده حكومت كې يې كار كاوه او د ډېر فساد، او چور، وغلا، په وجه امريكايانو بنديان كړي و ، هم په دي خبر شول ، بيا به يې زما دازارولو لپاره په خپلو منځو كې په زوره ويل چي موږ كه بنديان شو نو دوه دري كاله به وي، امريكايان خو زموږ دوستان دي بيرته به مو خوشي كړي پيسي او وظيفي به هم راكړي، غم ددغو خلكو دي چې عمر به يې ټول دلته تيريږي چې مطلب به يې زه وم، خو ما دځان سره ويل الحمدلله چې څه راباندي تيريږي يا تير شول نو داسلام لپاره وو ماخوقتل، غلا،اودي ته ورته څه نه دي كړي،خو افسوس ددغو خلكو په حالت دى چې هم يې دافغانستان او اسلام سره خيانت وكړ ، او هم بنديان دي دداسي بند يوه اونۍ هم زما د ټوله ژوند تر بند اوږده، او دردمنه ده. الله دي هر څوك ورڅخه وساتي.
بله اونۍ داخله شوه، ما به په زړه كې ويل چې څنګه به شي خو بياهم وارخطا نه وم، ځكه پوره اطمينان مي نه كيده، دهفتي په لومړۍ ورځ بل ځاي ته بوتلل شوم، چې مخكي مي نه ليدلي و، او نه مي اوريدلي و. دژوند ټول شرائط پكښي برابر و ، فرش كړې خونه جدا حمام، يخچال، تلويزيون، صابون، شامپو دخوړلو ميوي ايرکنديشن او دچايو ايشولو تجهيزات برابر و ، چې په لومړي ځلي مي په خپل لاس شين چاى جوش کړ او ومي څښه چې ما يې له ډېره وخته ارمان درلود، محقق راته راغى او راته ويې ويل نور ته ازاد يې مباركي يې راكړه او ددي منطقي مسؤول جنرال هم راغى مباركي يې راته وويله خو محقق ويل چې سبا ته به استازي راځي او بيا به دتګ معلومات دركړي، نورو وروڼو ته مي ډېره انديښنه وه چې په وچو شونډو ژوند كوي، ډوډۍ نه خوري او اوبه نه څښي. څه دبشر احترام او قانون دى؟.
دويمه ورځ په څلورو بجو استازي راغى او راسره كښېناست دكور معلومات يې راكړل او دافغانستان له حالاتو يې خبر كړم ، راته ويې ويل چې سبا په 12 بجو دشپي به انشاء الله پرواز وي، خو تر هغو پوري به ته استراحت وكړې ، ما دمحبس دوضعي راپور هيئت يا استازي ته وركړ، او ورڅخه ومي غوښتل چې دامريكايې مسؤولينو سره وويني او دبنديانو دوضعي په ارتباط خبره ورسره وكړي ده وعده وكړه چې دا كار به حتمي كوي، سبا سهار بيرته هغه ځاي ته بوتلل شوم چې د سزا لپاره جوړ شوي و هلته بيا قلف او دپخوا حالت شو، خو دې ته په تمه وم چې دسره صليب استازي راځي راسره ګوري، چې دمعمول له مخي هلته قانون هم داو، چې تر وتلو وړاندې به سره صليب ورسره كتل چې ملك ته د تګ موافقه يې واخلي كه څه هم امريكايانو ورته اعتبار نه وركاوه. خو له دې نه مخكي يودم څو امريكايان له ټلويزيوني كامرو سره غرفې ته راغلل او يو دپښتو ژباړن يې مل و، يوه دوسيه غوندي كاغذونه يي په لاس كې و، چې پر انګريزي ژبه ليكل شوي او په پښتو ژبه ژباړل شوي و ، په انګريزي ژبه ابلاغ اوژباړن به په پښتو ژبه ورسره بدرګه كول !!
څه وو- څو مادي وي چې بايد ما امضا كړې واى او منلي مي واي خو په داسي حالت كې چې دپرېښودلوزيري دركوي ،اونري تهديد هم ورسره مل دى په پارچه كې ليكل شوي و چې ماته يې دهغې د لاسليك کولو وويل.
لومړى، بندي په خپل جرم اقرار كوي، دامريكاله متحده ايالاتو څخه بخښنه غواړي، او دخوشي كيدلو په هكله يې چې امريكايې جرم معاف كړ مننه كوي.
2- بندي دالقاعدي او طالبانو غړى وو، بيا به له هغوى سره تماس او علاقه نه ساتي اوکمک به نه ورسره کوی.
3- بندي به بيا په تروريستي اعمالو كې شركت نه كوي.
4- بندي به بيا دامريكا او دهغوي دمتحدينو پر ضد هيڅ نوعه سياسي او نظامي فعاليت نكوي.
خو كه چيري بندي ددغو مادو تخلف وكړي بيرته به نيول كيږي او تر خپله ژونده به به بندکې ساتل كيږي .
دليك پاى � د بندي دلاسليك ځاي.
زه ډېر حيران شوم او راغلي امريكايان لوړ رتبه خلك و اوپر تلويزيوني ويډيو باندي ټول ريكارډ شول ، خو ما لاځواب نه و وركړي كاغذيې را وړاندي كړ، چې لاسليك يې كړم، خو ما بيرته كاغذ په غصې سره وروغورځاوه او دځواب په ويلو سره مې داسې خوله پرانسته، زه مظلوم يم مجرم نه يم، كله هم خپل جرم نه منم، كله هم بخښنه نه غواړم، كله هم له امريكا څخه دخوشې كيدو مننه نه كوم كوم جرم مي كړى چې قانون ورته جرم وايي، كومي محكمي او كوم قانون مجرم ثابت كړي يم!!!
2- زه طالب يم طالب وم طالب به يم، خو دالقاعدي غړيتوب نه لرم
3- په كوم تروريستي عمل كې مي لاس وو، چې بيا به يې نه كوم راته يې و ښيئ که رشتينی ياست؟
4- افغانستان زما كور دي، پر ما څوك حق نلري چې په خپل كور كې مي دكور دچارو بند كړي، او په داسي حال كې چې دكور مالك زه يم او بل څوك عارضي يرغلګر ما بندوي.
5- بندي خو اوس هم وم په كوم قانون او ولي بندي وم، بيا مي هم بې له دليله بندي كولي شي نو له همدې لامله دلاسليك ضرورت نشته او نه يې امضا كوم!!
خو دوي په ډيراصرار سره راته وويل چې كه دغه كاغذ لاسليك نه كړي، نو ته خوشې كيدلي نشي خو ما ورته منفي ځواب وركړ، كه مي عمر هم تير شي دابه ونه منم چې مجرم يم، څو ځله بهر ولاړل او بيا به راغلل چې كاغذ ورته لاسليك كړم خو لاسليك مي نه كړ، په څلورم ځل يې راته وويل چې يو څه خو وليكه په خپل لاس سره يي وليکه چې دغه مادي نه مني څه چې ته مني هغه وليكه ، داړتيا له مخې مي قلم را واخيست او لاندي ليكنه مي وكړه: (( زه مجرم نه يم کله می هم دجرم مرتکب نه وم يومسلمان مظلوم يم پاكستان ،او امريكا له ما سره ظلم كړيدي، څلور كاله يې بي برخليکه ساتلي وم، موافقه كوم چې دامريكا په ضد به په نظامي عملياتو كې برخه نه اخلم.) والسلام.
دا مي لاسليك كړ او دوي راڅخه ولاړل ، زه په چورت كې ډوب پاتي وم، چې دوي به دا ليكل څنګه مني او دوي كولاي شي چې هر څه بدل كړي. په هرصورت له دې لږ وخت وروسته دسره صليب استازي راغلل راسره كيښناستل او دخوشي كولو زيرى دوى هم راكړ، خو لږ وروسته يې راته وويل چې ته موافقه لري چې افغانستان ته ولاړ شي كه نه؟
ما ورته وويل كه موافقه و نلرم، نو تاسو را سره څه مرسته كولاي شئ او كه به په دغه محبس كي پاتي يم، دوى خپله ناوسي وښودل چې مونږ څه نشو كولاي بيا هم دامريكايانو كار دي، رښتيا هم دوي ناوسه وو، او ما بله چاره نه درلوده يا راتګ افغانستان ته، يا بند خو افغانستان زما كور دى زه ورسره مينه ، محبت لرم، خو يواځې له دوي څخه مي دا معلوموله چې دڅه لپاره راڅخه پوښتنه كوي چې په وس كې مو هم څه نه وي، او دامريكايانو نارواوو ته قانوني بڼه وركوئ، دسره صليب مراسم خلاص شول ، بيرته پنځم كمپ ته بوتلل شوم چې له خپلو بندي وروڼو سره خداى پاماني وكړم، هلته وروڼه سپېره لکه له قبرو چې را ايستل شوي وي ، په يوه قفس كې وسره راټول کړای سوی وه ، چې زه هم ورغلم، تقريباً يو نيم ساعت ورسره كښېناستم او بيا ترې رخصت شوم، رښتيا هم چې دځان خلاصيدل راته بدښكاريدل،ځکه چې ددين وروڼه مي راڅخه دژوند په بدحالت كې پاتې كيدل، كه څه هم ټول وروڼه زما په خوشي كيدلو خوشحاله و ، په پنځم كمپ کی مي يواځې له افغانانو سره وکتل صرف اته نفره هلته و ، چې مخكي مي يادکړل ، خو له عربو وروڼو سره دکتنې اجازه رانكړل شول، له هغه ځايه لومړي كمپ ته بوتلل شوم په لومړي كمپ كې مي له افغانانو څخه بيا رخصت واخست، بيا څلورم كمپ ته راغلم، په څلورم كيمپ كې مي له ټولو وروڼو څخه رخصت واخيست له عربو او افغانانو ټولو څخه، وروسته بيرته هغه ځاى ته بوتلل شوم چې څه استراحت وكړم، او ډوډۍ وخورم، يوولس بجي وې لمونځ مي ادا كړ ډوډۍ مي وخوړل ويده شوم، پر يوه بجه بيرته راويښ كړل شوم دموټر په واسطه ميدان ته راوستل شوم، او په هغه پټه مي لاسونه تړل شوي و ، چې لومړى ځل به دوي بنديان ورباندي تړل، دموټر دروازي خلاصي شوي دسيمې جنرال سرښكاره كړ، او عسكرو ته يې امر وكړ چې له لاسو څخه يې پټۍ خلاصي كړئ، او له موټر څخه يې لاندي ښكته كړئ دهوايي ډګر ټول ګروپونه مړه شول، چې مخته مې وكتل يوه الوتكه پرواز ته چمتو ولاړه وه ورنږدي شوم، يوې خواته امريكايان و ،او بلې خواته افغان راغلي استازي ولاړ و، چې په رسمي بڼه يې دافغانستان راغلي استازي ته تسليم كړم، استازي دخوشي كولو مباركي راكړه، او راته ويې ويل چې الوتكي ته وخيژم، دا وروستى ځل و، چې دامريكايي عسكرولغړن درانه لاسونه مي له اوږو بيرته شول او په خپلواک ډول الوتكي ته وختلم، وړه جيټ الوتكه وه چې افغان هيئت له ځانه په كرايه راوستې وه، جنرال الوتكي ته راوخوت او ګوډ باي Good byيې راته ووايه او څلور كسه نور امريكايان هم په الوتكه كې و ، دالوتكي عمله څلور نور امريكايان وو، داسي معلوميدل چې امنيتي كسان وي سره لدې چې الوتكه دشخصي شركت ملكيت وه، دشپي دري بجي وي چې الوتكه هواته والوته، افغان هيئت راته افغاني كالي او لنګوټه راوړي وه، په الوتكه كي ازاد وم ښه په راحت سره مې دالوتكي په داخل كې تګ او راتګ كاوه، تشناب ته تلم ويده کيدم او ډوډۍ اونوري ميوي راكول كيدلي، لس ساعته وروسته الوتكه په انګليند كې دتيلو لپاره ښكته شوه له يوه ساعت درنګ څخه بيرته هوا ته والوته، تر اوو ساعتووروسته دكابل پر خواجه رواش هوايې ډګر ښكته شوه، خو كابل له څلورو كلو وروسته راته ډېر نابلده ښكاره شو په ځانګړي ډول په هوايي ډګركې دنوي تغيراتو له امله چې امريكايانو دومره امنيتي كوڅي پكښي ايستلي وي چې نږدې كوچني ښار معلوميده دخاوری ډکی بوجی اوسيميټی ديوالونه، دكابل په هوايي ډګر كې مي دشكر سجده وكړه او وروسته ټاكل شوي ځاي ته بوتلل شوم، اوس مي نږدې لس مياشتي پوره شوي په كابل كې په هغه سراي كې اوسيږم چې دموجوده حكومت له خوا كرايه شوي دي، له خپلو اولادو سره ژوند كوم امنيتي چاري مي دحكومت پر غاړه دي او دموجوده حكومت په خبره ديوه كال لپاره خوبه شرائط همداسي وي خو كله چې كال پوره شي نو بيا نه پوهيږم چې څه به كيږي .
له ټولو وروڼو مسلمانانو څخه دځان او ټولو مظلومو وروڼولپاره ددعا غوښتنه كوم.الله دی ټول وروڼه دکفاروظالمانودتوقيفونواوهم دټولوزندانونو په خيرسلامت راخلاص کړی الله رب العالمين مو دي تردې له سختو ازموينو وساتي، او په امتحانونو كې دي الله (ج) دبري توفيق راكړي.