د ښايست اثر
چې سترګې د يار ګورمه جامونه راپه ياد شي
و مخ ته يې نظر کړم سره ګلونه راپه ياد شي
د سترګو په کتو يې زه بې خوده په نشه شم
چې شونډو ته يې ځير شم سره لالونه راپه ياد شي
دا حسن دا ښکلا او دا جمال چې د يار ګورم
دا ښکلې پوښتنې دا اسمانونه راپه ياد شي
دا تورې زلفې ګورمه په څټ يې را اړولي
ميدان د پاړوګرو کې مارونه راپه ياد شي
ښايسته دا دنګه ونه دې مثال د تنکۍ لښتې
اثر يې په ما زيات دى چې شعرونه راپه ياد شي.
ملالۍ ساپۍ
١٣٦٤ل کال
توده مينه
که مينه غواړې د وطن مينه درنه مينه ده
تر ډېرو ښکلو د وطن مينه ښايسته مينه ده
دا هسې مينه ده چې هېڅ يې هېرولى نه شم
زموږ د ګران وطن سپېڅلې پښتنه مينه ده
د وطن مينه کې وفا ده اى پښتونه وروره
ژر شه وردانګه دا د حورو عجيبه مينه ده
په مينه سرور کول دا د هر مين دنده ده
د خپلواکۍ ټينګول زموږه ديرينه مينه ده
رب نه مې غوښتي چې په دې مينه کاميابه شمه
د ملالۍ له جوشه ډکه دا توده مينه ده.
ملالۍ ساپۍ
