ډېره د خوښۍ خبره ده، چي په دې وروستيو كي د ځوانانو مينه له خپل فرهنګ او
ادب سره اورنۍ شوې ده او د خپل فرهنګ د بډايني لپاره يې لاري چاري مشخصي
كړي او درانه ګامونه ورباندي اخلي، چي پر دې لار يې ټولو اړتياوو ته په پام
سره چوپړ ته ملا تړلې ده.
د دغسي فرهنګ مينو، هڅاندو او خواريكښو زلميو له ډلي څخه يو هم ځوان او با
استعداده نثار احمد آريا دى، چي همدا اوس- اوس يې د غوره كيسو يوه ژباړل
شوې ټولګه ستاسو په لاس كي ده او زموږ دا هيله ده چي د ذوق ژبه، به پر
وټكوئ.
ښاغلى اريا كه له يوې خوا د پښتو لنډي كيسه ليكني پر ډګر راټوكېدلى خدايي
غاټول دى، خپله هم لنډه كيسه ليكي او د لنډي كيسې ليكني بريالۍ تجربې كوي،
دغه راز د نورو ليكوالو له غوره كيسو څخه هم ژباړي كوي.
ښاغلى اريا د لنډو كيسو په ټاكنه كي د ښه ذوق څښتن دى او زموږ د دې خبري
زبات به ان شا الله تاسو د دغي ټولګي په منځ- منځ كي ووينئ. د ګران اريا
يوه ډېره ښه ځانګړنه دا ده چي ده خپله ټوله پاملرنه يوازي او يوازي د لنډي
كيسې مطالعې او تجربې ته اړولې ده، دى هڅه كوي چي يو كار وكړي او پوخ يې
وكړي. نو موږ به د ده د لومړني فرهنګي چوپړ لومړنۍ بېلګه (د ناوي بنګړي)
ستاسو د ذوق مخي ته كښېږدو.
خداى دي وكړي چي خوښي مو شي او موږ به خپلي خبري په دې دعا رالنډي كړو، چي
خداى دي وكړي زموږ دغه نوى غوړېدلى ګل د وخت له سړو او نامردو سيليو څخه تر
ډېره په امان واوسي او خوږبويي يې تر ډېره په لره او بره پښتونخوا كي خپره
وي او د ټولو پښتنو دماغونه په تر او تازه وي.
امين ثم امين
په ادب، مينه او درنښت
بېنوا فرهنګي ټولنه_ كندهار
