دوه پوښتنې
مور تپوس راځنې وکړو
کوم څيزونه دې خوښېږي؟
ما ځواب کې ورته ووې:
درې څيزونه مې خوښېږي
چې دي:
ژوند، مينه او حسن
هغې بيا پوښتنه وکړه
کوم څيزونه دې بدايسي؟
ما ځواب کې ورته ووې:
درې څيزونه مې بدايسي
چې دي:
مرګ، وينه او ظلم،
غزل
په موږه بدنصيبو د تورتم مهرباني ده
د يار د تورو زلفو پېچو خم مهرباني ده
دا موږه جل وهلي يې د ګوټ په تمه مړه شو
په غير و غمازانو د صنم مهرباني ده
يارانو د دار لوبه خو لا نه ده ختمه شوې
چې نه مرو دا په موږه د ستم مهرباني ده
دا اوښکې مې د سترګو څه ګيلې څه اسوېلي شي
د وخت راباندې دا په هر قدم مهرباني ده
اشنا د موسېدلو حق له موږ نه دى اخيستى
د خپل او د پردي پر موږ د غم مهرباني ده
زما په وران مالت ورانې جونګړې وران وطن کې
د مرګ او د سرو وينو دم په دم مهرباني ده
د زړه د پرهرونو د ټکور اميد يې نه شته
چې نن په رقيبانو د مرهم مهرباني ده
