د نېكولو مكياوېلې ډالۍ

اعليحضرت لورينتسو دي پيرو دي مېديچي ته د نېكولو مكياوېلې ډالۍ

څوك چې غواړي د يوه ټولواك د پېرزونې او ملاتړ وړ وګرځي، د دود له مخې ټولواك ته داسې شيان ډالۍ كوي، چې تر ګردو قيمتي او ارزښتناكه وي او يا يې په اند د ټولواك د خوشاله كېدو لامل ګرځي. د بېلګې په توګه: هغوى زياتره نوميالي اسونه، اعلى وسلې، د سرو جامې، قيمتي كاڼي، د سينګار او زينت داسې نور وسايل، چې د ټولواك له برم او جلال سره برابر وي، هغه ته وړاندې كوي.
ستا درانه حضور ته! د دې لپاره چې د خپلې مينې او فدويت كره نښې وښيم، اړ شوم چې خپله شتمني وپلټم او يوه داسې ډالۍ، چې د پاچايانو حضور ته د وړاندې كولو ارزښت ولري، پيدا كړم.
تر ژورو فكرونو وروسته د سترو او نوماندو مېړنو د اعمالو له پوهې پورته مې بل قيمتي څه پيدا نه كړل، چې په اوسنيو چارو كې د يوې اوږدې تجربې او د لرغوني تاريخ د يوې پرله پسې مطالعې پايله ده، چې د دې مطالعې لنډيز مې په پوره دقت او تر اوږد زيار وروسته په دې كتاب كې راغونډ كړى او دا دى د سترتوب او برم د خاوند حضور ته يې وړاندې كوم.
كه څه هم زه دا كوچنى اثر ستاسو لوړ مقام او حيثيت ته د ډالۍ وړ نه بولم، خو بيا هم د ستاسو پر ترحم او زړه سوي باور لرم، چې كه زما دې حال ته پام وكړئ چې پرته له دې چې په ډېر لږ وخت كې د هغو حقايقو او رازونو د زده كړې وخت دركړم، چې په زده كړه كې يې ما د كلونو اوږد وخت لګولى او بې شمېره ګواښونه او ستونزې مې ګاللې دي، د بلې ډالۍ وس نه لرم، ستاسو په درانه حضور كې به د منلو وړ وګرځي. دا كتاب مې په ډېرو تشريفاتي او پېچلو الفاظو نه دى كښلى او نه مې د تاريخي دورو په شمېرو ډك كړى دى. يا هم د نورو ليكوالو په څېر نه يم توانېدلى چې د كتاب باندنۍ برخه په نقش او نګار داسې ښكلې كړم چې په خپل سر د پام وړ وګرځي. ځكه زما اصلي نيت دا دى چې يا هېڅ ارزښت ورنه كړل شي، يا دا چې د موضوع حقيقت او يا يې د مطالبو ارزښت د منلو وړ وګرځي... او نه له هغو سره همغاړى يم، چې يو ډول غرور او ځان ښودنه يې بولي، كه يو بې ارزښته او د ټيټ پوړ وګړى، دا زړه وكړي چې د ټولواكو سلطنتي او سياسي مسئلې وڅېړي، او د حل لارې- چارې يې اړوند ټولواك ته په ليكلې بڼه وړاندې كړي. ځكه څوك چې نقشې انځوروي، د دې لپاره چې د غرونو د هسكو څوكو او لوړو ځايونو څرنګوالى په سمه توګه اټكل كړي، ځان لاندې په دښتو او ډاګونو كې ځاى پر ځاى كوي او د دې لپاره چې د اوارې او دښتې سمه اندازه واخلي، د غرونو په څوكو او لوړو ځايونو كې ځاى نيسي. په همدې توګه ويلى شم د دې لپاره چې د ولس د طبيعت سم اټكل وكړو، بايد د ټولواك په مقام كې ځاى ولرو او د دې لپاره چې د ټولواك سم اټكل وكړو، نو بايد د ولس يوه برخه شو.
نو اى د سترتوب او جلال خاونده!
زما دا كوچنۍ ډالۍ په هغه احساس او جذبه ومنه، چې ما ستاسو درانه حضور ته وړاندې كړې ده، چې كه يې په بشپړ دقت ولولئ او په پام كې يې ونيسئ، نو زما اصلي غوښتنه به احساس كړئ. موخه مې هغه لوړوالي او سترتوب ته د ستاسو رسېدل دي، چې د ستاسو بخت او نورې نېكې ځانګړنې يې ژمنه كوي. او كه د ښكلا او برم خاوند د خپل سترتوب او عظمت له لوړې څوكې څخه خپلې سترګې دې ټيټې سيمې ته راواړوي، وبه ويني چې څنګه بې برخې او پرته له كوم ارزښته د بخت او تقدير له تلپاتې كينې او بې غورۍ څخه ځورېږم.